වැනිල්ල

බාර් එකක පොඩි ටේබල් එකක දෙපැත්තේ

වෙනම අඩි ගහන දෙන්නෙක් වැනි වැනි උන්නේ

එකෙක් පුටුවෙ පැත්තෙන් පැත්තටයි වැනෙන්නේ
වීදුරුවෙන් බිඳකුත් නෑ බිමට හැලෙන්නේ


අනිකා ඉන්නේ හිටගෙන ඒත් වැනෙනවා
ඉස්සරහට සහ පස්සට ඉණ පද්දනවා

පැත්තෙන් පැත්තට වැනෙනා එකා අහනවා
මොකද ඔහොම පද්දන්නේ කියල කියනවා

මම විතරයැ තමුසෙත් ඔය යසට වැනෙන්නේ
ඉස්සෙල්ලම කියනව ඇයි එහෙම කරන්නේ

මම අවුරුදු පහලොවක්ම නැව්වල හිටියේ
වැනි වැනිමයි හැමදේමත් කරන්නට වුනේ

නැවෙන් බැහැල දැං අවුරුද්දක්වත් නෑනේ
අර පුරුද්ද තාමත් මට නවතනු බෑනේ

ඒ වුණාට තමුසෙ එහෙම නෙමෙයි වැනෙන්නේ
ඇයි මේ ඉණ හරියෙන් ඔය හැටි පද්දන්නේ

එහෙනං පුදුමයක් නෑනේ ඔහෙගෙ වැනිල්ල
එච්චර කල් නැතත් මගෙත් ඇත පැද්දිල්ල

දවස පුරා කරනා දේ අනුව තමයිනේ
මේ පුරුද්ද මේ විදිහට මටත්  බෝ වුණේ

නවතනවා හිතන්න බෑ මේක ඉතිංනං
දනීද මම බැඳල ඉන්නෙ - කිම් ක‘ඩෑෂියන්




(බ්ලොග් නොලිව්වත් බ්ලොග් ලෝකෙට ඉතාම ආදරය කරන ඒ වගේම අපි කවුරුත් දන්න දෙන්නෙක් තමා පත්තරයා සහ මෙන්ඩා. මේ නිර්මාණයට අදහස සැපයුවේ අපේ මෙන්ඩා. මෙන්ඩො, උඹට බොහොම ස්තූතියි. පොඩි වෙනසක් කලා තරහා වෙන්න එපා ඈ....)