උපන් දිනය

මගේ උපන් දිනය යෙදුනු - ගියමාසේ පස්වෙනිදා
උදේ අවදිවූයේ මං - සිත් ප්‍රමෝදයෙන්

තිස් තුන් වසරක සේවය - නිම කරලා ඉසිඹු ලබා
අදරැතියන් හා එක්වෙමි - හෙට දිනේ පටන්


පිය බිරිඳගෙ දරුවන්ගේ - කාර්යාල සගයන්ගේ
සුපැතුම් මැද උපන් දිනේ - සමරමිය ඉතින්

කාමරයෙන් පිටවූයෙමි - මුළුතැන්ගෙය වෙත ඇදුනෙමි
බිරිඳ සිටී උදේ කෑම - පිළියෙල කරමින්

වගේ වගක්වත් නැතිවා - සු‘පැතුම් අහලක නැතිවා
ඇය ඉන්නේ පුරුදු ලෙසින් - ඇගෙ වැඩ කරමින්

දරුවන් පාසැල් යන්නට - සැරසෙනවා කඩිමුඩියේ
උන් හට මා ඉන්න වගක් වත් නෑ දැනුනේ

හැමදාමත් පිළිපැදෙනා - කාලසටහනේ හැටියට
කිසි වෙනසක් නැතිව අදත් - වැඩ සිදුවෙන්නේ

මහා අඳුරු හැඟීමකුයි - ඒ සමගම හිස් බවකුයි
හිත පුරාම පිරිලායන - බවකිය දැනුනේ

කිසිවෙක් නොම කතා කලේ - මා ගැන නොතකා සිටියේ
මන්දැයි සිතමින් වැඩබිම - වෙතට පැමිණුනා

එහි වූ සැම දෙනාමත්ම - වෙනදා සුපුරුදු විලසින්
සුබ උදෑසනක් පමණක් - පතා ඉගිලුනා

මේ කිසිවෙක් නොදන්නේද - අද මා ඉපදුනු දා බව
ඒ විතරද අද මෙතනින් - මා නික්මෙනවා

අඳුරු හැඟුම් කලු වූයේ - අසුනට මා පියනැගුවේ
මේසය මත හිස හොවාන - සිත ඉකිබින්දා

ලතාවකට හඬ නැගෙනා - උස් අඩි පාවහන් නදින්
මේසය මත දියව තිබූ - හිස එසවූවා

සුදු පැහැ කමිසය සමගින් - වූ රතු කෙටි සාය අගින්
ඇගෙ සියුමැලි දෙපා දුටිමි - ඇත් දල පාටින්

(උපුටාගැන්ම)

ඇගේ සුමුදු ඇඟිලි අතර - රැඳි රතු පැහැ රෝස පොකුර
කාල වර්ණ හැඟුම් ඉරා - මවෙත දිගු වුණා

සුරඟුන් පරදනා ලෙසින් - දීප්තිමත් රුවැති මුහුණ
සිනා පොකුරු මල් වැස්සක - නෑවී තිබුණා

සුභ උපන් දිනක් වේවා - කියා මා කොපුල් තෙමුවා
මගේ සිහින කුමරි සිටී - අදත් මා ලඟින්

අද දහවල් කෑමට අපි - එළියට යමු නේද කියා
සිනා සපිරි මුවින් යලිත් - විමසා සිටියා

සැම අඳුරම පහව ගොසින් - සිත් මල් විල පුබුදු වුණා
ඇය සැමදා සිටියා නොවැ - මා සනසවමින්

නැගී සිටියෙ ඉඳුකිල සේ - නිල බලයද සිතට රැගෙන
ඔව් අපි යමු කෙල්ලෙ - කියා පිළිතුරු දුන්නා

දිවා විවේකය එනතුරු - ඇඟිලි ගනිමිනුයි සිටියේ
අවසන් දින මේ තරමට - දිගු වූයේ ඇයි

අැය රථයේ ඉදිරි අසුන - අරා සිටී රැජිනක් ලෙස
ඉගිල ගියෙමි හොඳම අවන් හල කරා ඇදී

ජීවිතයේ කිසිම දාක - බිරිඳටවත් ලබා නොදුන්
ඉස්තරම්ම කෑම බීම - ඇණවුම් කෙරුවෙම්

පැයක පමණ සල්ලාපේ - යෙදෙමින් එහි ගතකෙරුවා
ආපසු එන්නට හැරෙද්දි - ඇය කතාකලා

අද ඔබගේ අවසන් දින - මේ දින අපි සැමරිය යුතු
හවස් වරුව නිවාඩුවක් දාමුද දෙන්නා

යලි අමතක නොවන ලෙසින් - මේ සැඳෑව ගතකරන්න
මගෙ ඇනෙක්සියට ඇවිදින් - වරුවක් ඉන්න...

සිහිනයක්ද මේ දකින්නෙ - අදහන්නත් බෑ මෙවදන්
මිටෙන් හල සියොත් විලසින් - සැනින් ඉගිලුනා

ඇගේ නිවස වෙත ආවා - කිසිවෙක් නෑ පෙනෙන්නටත්
හෙමින් සැරේ අප දෙදෙනා - ගෙට ගොඩවූයේ

ඔහොම සාලෙ වාඩිවෙලා - විවේකයෙන් ඉන්න ටිකක්
මම ඇඳුමත් මාරුකරං - සැනෙකින් එන්නම්

ඇය එලෙසින් පවසාලා - ඉඟ සුඟ දෙපසට සලමින්
ලතාවකට පියගැට පෙල - නගින්නට වුණා

මේ වනවිට හැම දේමත් - සිදුවන හැටි පුදුම නමුත්
අමතක නොම වන දවසක් - බව මට හැඟුනා

අවුරුදු ගානක් තිස්සේ - හිත යට හිරකර තබාපු
මිහිරි සිහිනයක් අද දින - අත්විඳිම් මෙමා

එය කෙලෙසින් අරඹන්නද - පිළිවෙල සැනෙකින් පැටලේ
ඇගෙ සිත වෙනසක් වෙන්නට - පෙර ඉක්මන් වෙම්

ඉහල මහලෙ දොර ඇරිලා - පියගැට පෙල බැස එන්නේ
ඇය මේ වර කේක් එකක් - දෝතින් ඔසවා

ඈ පිටුපස වැල නොකැඩී - මගේ බිරිඳ දරුවන් හා
කාර්යාල සගයන් සැම - පේලියෙ එන්නා

සුභ උපන් දිනක් වේවා - සැඳෑ දිවිය සරු වේවා
සැම දෙන එක හඬින් එසේ - මට සුබ පැතුවා






මේ සැමදෙන පිළිගන්නට - සාලෙ සැටියෙ දිග ඇදිලා
ඇඟේ නූල් පොටක් නැතිව - බලා උන්නෙ මං..........

෴෴෴෴෴෴෴෴෴෴෴෴෴෴෴෴෴෴෴෴෴෴෴

අදහස සහ අත්දැකීම- රණශූර විචාරකතුමා

පදරචනය හා තනුව - සත්ගුණවත් මදාවිතුමා