අම්ම ගියා...ඈ...ඈ...ඈ...

(http://urwhitecat.wordpress.com/2012/02/19/crying-baby)

පංතියේ කොටුදැලෙන්
පෙනුනු ලා කොළපැහැය
හැරවීය හිස මගේ
...........අපේ අම්මා අැවිත්!

ලොසිංජර අහුරකුයි
ටීචගෙන් හොඳනමයි
පුංචි හිත පිරීලා
සිනා පණහක් මවලා

විනාඩියකින් දෙකෙන්
ඈ ගියා නික්මිලා
“මාධවිට ආසනං
අම්ම එක්කල යන්න“


කිරිල්ලට තටු ලැබිණ
අම්ම ඈතික් පෙනේ
කවදවත් නැති තරං
වේගයෙන් දිවගියෙමි

ඈත ලා කොළ පැහැය
බල බලා දිව යද්දි
පය ගලක පැටලිලා
අනේ....... මං වැටිලා

හිස හෙමින් ඔසවලා
බලද්දී කඳුලු අතරින්
රතුපාට බස් එකක
කොළ පැහැය සැඟවුණා

හඬ හඬා නැගී සිට
ගෑටුවෙමි පංතියට
“ඇයි පුතේ ගියෙ නැද්ද?“
................
“අම්ම ගියා..ඈ...ඈ...ඈ...“