චාරිකාව

ව්‍යාපාර කීපයක්ම - අයිති කෝටිපතියෙකී
කිසි සැපකින් අඩුවක් නම් - කිසිම දිනක නොම දකී

පුරුදු පරිදි මේ මිනිහට - ලස්සන බිරිඳක් ඇතී
ඒ මදිවට පෞද්ගලික - ලේකම් වෙයි පෙම්වතී


මේ අයථා බන්දනේ - බිරිඳද දන්නේ නැතී
පෙම්වතියද කිසිම දිනක - බිරිඳ මුණ ගැසී නැතී

මේ දෙදෙනට මැදි වෙලා - ඉන්නා අතරෙදි අනේ
ධනවතාට අපූරු වූ - අදහසකිය ඇති වුණේ

බිරිඳ සමග පෙම්වතී - එකම නැවේ නංවලා
විනෝදයට සවාරියක් - ඔහු සූදානම් කලා

ප්‍රවේශපත් යුගලකුත් - දෙදෙනා හට යවමිනේ
අවසර දුන්නා තනිවම - ගිහිල්ල එන විලසිනේ

***

දින දෙකකිය ගත වුනේ - සවාරියද නිම වුනේ
ආපසු ගොඩ බැස්ස බවද - ධනවතාට සැල වුනේ

බිරිඳට අමතා බලා - තොරතුරු විමසුම් කලා
ගමන ඉතා විනෝද යැයි - ස්තූතිය පළකලා

ලේකම් හැඩ රුව කියා - ඇය මිතුරියකැයි කියා
සැමියා විමසයි නැවතත් - ඇය කොහොමද යැයි කියා

අපෝ නියම බඩුවකී - වල්කම නම් නිම නැතී
නැවේ සිටිය හැම මිනිහම - සමගින් නිදියන්නැතී

හිත පෑරී ධනවතා - පෙම්වතියට අමතලා
නැවේ ගමන ගැන විමසයි - වෙනසක් නොම පෙන්නලා

ගමන හරිම විනෝදයි - ඒ ගැන මා ණය ගැතියි
කී වට ධනවතා ඇගෙන් - බිරිඳ ගැන මෙසේ අසයි

අහවල් හැඩ රුව ඇතී - ඇය මිතුරියකිය මගේ
ඇයත් ගියේ ඔය නැවේම - මතකද සිටියා වගේ

ඇය අමතක වෙන්නට - අන්ධ කෙනෙක් විය යුතුයි
ඇයගේ ලස්සන දැක්කම - මටනම් හරි ඉරිසියයි

එනමුත් පති භක්තිය - හොඳින් රකින බිරිඳකී
නැවට ගොඩවුණෙත් බැස්සෙත් - සැමිය සමග පමණකී