ඒ ලෙවල්

(ඇගේ සිහිනය මා සිතුවම් කලා පමණි)

කිරි කොකුන් රංචුවක් - සේ පෙරට ඇදී එන
සුදු ගවුම් පොඩි අතර - නුඹ සෙවූ මගෙ දෑස
නෙක වනින් සැරස සිටි - දෙගුරු කැල සිසාරා
ඉස්සි ඉස්සී බලා - මා සෙවූ නුඹ දෑස 



මුණගැසෙන නිමේෂය - දිලිසෙනා ඔය දෑස
කිරි සිනා මල් පිපී - ඉතිරෙනා මුව පොඩිය
දහක් මල් කැකුළු මැද - මගේ සිත පුබුදුවුන
සුව දසුන නුඹම විය - පෙර දිනෙක ගෙවීගිය

යෞවනයෙ දොරටු මැද - කෝල සිනහා සිරව
දිදුලනා දෙනෙතකින් - ලොවක් සොයනා නුඹට
වසර පහලොවක් ඇඳි - සුදුගවුම උනාලා
අල්මාරියේ කොනක - තබන්නට සිදු වුවත්

එවන් වූ රාමුවක - සදා දුටු නුඹේ රුව 
මගේ සිත් කොනක හිඳ - සිනාසෙයි මා සමග
සුදුගවුම තුල රැඳෙන - අවසාන දින දහය
එළඹිලා ඇත මෙදින - වැළැක්විය නොහැකි ලෙස

අසන දකිනා සැවොම - අමාරුද ලේසිදැයි
දහස් වර යළි යළිත් - සවන් යුග රැව්දෙනා
දිව දෙතොල නොගෑවී - මුව තුලින් පිටවෙනා
පිළිතුරක් නොපතනා - හුරු පුරුදු විමසීම

පාසලේ පන්තියේ - සොඳුරු වූ පිළිමළුන්
අබිබවා යමින් වුව - ඔබව සොයනා මෙදින
දෙමාපිය රෑන් ඇත - එක් පසෙක පෙළ සැදින
තව පසෙක නෑ සියන්  - පෙනී නොපෙනී ඇදෙන

නුඹට වැරදුනු බවක් - අසන්නට ලැබුණොතින්
සිහින් වූ කුරිරු වූ - මදහසක් මුව ඇඳුනු
දහසකුත් මුහුණු ඇත - නෙත් අයා බැලුවොතින්
මුවැත්තියෙ නුඹ නොදුටු - ඒ සිනා මට පෙනේ

ඒ වුණත් දියණියේ - තවත් දෙදෙනෙක් සිටී
නුඹේ කුස පිරී ඇති - බවට සහතික වෙන්න
අල්මාරි තට්ටුවල - සළු පිළී පුරවන්න
රාක්කද මේස පුටු - පොත් වලින් පුරවන්න

අවරෝහණය වෙනා - කැලැන්ඩර දින ගණන
නොවැරදී ගැන ගැනා - තත්පරෙන් තත්පරය
ගෙවීගිය ප්‍රවේගය - ත්වරණයක් වූ බවට
මනාකොට පසක් වූ - තවත් දෙදෙනෙක් සිටී

නුඹේ සිත ගැහෙන සේ - සමානම වේගයෙන්
ගැස්සෙනා සිත් දෙකක් - ඇති බවත් දැනගන්න
යෝධ පිම්මකට නුඹ - සැරසෙනා මේ මොහොත
නුඹේ රැකවල් දැලද -  සවිමත්ව එළා ඇත

දිණුම උද්යෝගයෙන් - අපේක්ෂාවෙන් ඉන්න
ලැබුණොතින් පැතු දිණුම - උත්කර්ෂයට ගන්න
නොලදහොත් ඒ වරම - උපේක්ෂාවෙන් ඉන්න
මගහැරුණු පාඩමකි - තාත්තාගෙන් ගන්න







සමාන ඉරණමකට මුහුණපා සිටින අපේ ඩූඩයියාගේ දියණියටත් උණුසුම් සුභ පැතුම්...නියත ජයකට!