ස්වස්ථි සිද්ධම්!!!

ඉඳහිට ගලා එන
සිතිවිලි අකුරු කරමින
නන් තැන්හි රැඳෙමින
කව් රස බෙදූ මැනවින

නිදහස් සිතට එන
කව් පද එකින් එක ගෙන
ගලපාගෙන සොඳින
මියුරු නමකින් අකුරු කරමින



ඔබ හා රැඳෙන්නට
වරම් පතනෙම් මේ ලෙස
මා හැඳිනගන්නට
යොදන කාලය විඳින් කව්රස


සිංහලේ සයිබරය
වෙතට ගොඩවුණි පස් වසට පෙර
පැරකුම්ගෙ අඩවිය
අදත් කියවමි නොදා බර බර

මාතලං නමිනේ
සයිබරයෙ මුරපොලක් තිබුණේ
මේ අඩවි රැකුණේ
ඔහුය ඇදුරිඳු අකුරුකරණේ

අලුත ඉපදුනු දරුවට
අතදී නැගිට ගන්නට
කරනා මෙහෙවරට
තුති පුදන්නෙමි අටං පහුරට

විචාරක ලොක්කා
මහ දැනුමක් බෙදන්නා
තද වෙනුත් දැක්කා
අසා දැක තව තව සොයන්නා

සියලු රස සමගින
අච්චාරුවක් දාමින
දේශකයා නමින
පොරකි වයසක මෙමං සලකන

සැලසුම් ඉදිකෙරුම්
සමගින් ඉවුම් සහ පිහුම්
රැගෙන ලිපි මනරම්
එළ පොරක් ඇත චෙෆාකී නම්

මුරුගයෙක් බියකරු
වලියට බරයි නිරතුරු
ලියන දෑ නං පියකරු
ඉන්දිකය ඒ මහ ලියුම්කරු

රුසියන් නමක් එල්ලා
අමු සිංහලෙන් කොටනා
කරකවා අතහරිනා
සිරා පොරකිය ඉවාන් නමිනා

සුන්දරය සඳුමල්
ගලායන රස ගී වැල්
පසුබිම ලියා මනකල්
සිත් පහන්කර තබයි හැමකල්

හදගැස්ම සැනකින
නවත්වාලන රසඳුන
පොඩි පොඩි කව් ලියන
අවන්හල අපි නිතර ගැවසෙන

කෙටිම කෙටි වදනින
පිළිතුරු ලෙසින් බඳිමින
පියවි දෙනෙතින් බලමින
සිහින සිත්තම ඇඳෙයි දින දින

කාමරේ අරිනා
නමකින් සිරා කොලුවා
නොදුටු පැති දුටුවා
උගේ කියමන් නිතර බැලුවා

සී ජේ විදානේ
සබරගමු විදු පුතෙක් වන්නේ
නොමැත මලදානේ
නම වෙනස් කර “දෙතරු“ දානේ

විභීෂණ ගොයියා
මාතලංගෙත් අයියා
යක්ස සෙන්පතියා
උඹනං යකෙක්මයි වීභීෂණයා

ප්‍රියා එළ කොල්ලෙකි
කමෙන්ට් වලදී ලෝබ නැත්තෙකි
මේ ලඟදි ඇදගත්තේ
අමුම අමු වැසිකිලියකි

නුඹ සැවොම ඇමතුවේ
කළගුණයි ඒ සැලකුවේ
අනෙක් අය නොකියවුනේ
මතක නැතුවා හෙම නොවේ

තව චරිත ගොන්නයි
ලිව්වොතින් කවි පැදුර පරදියි
නොකියවුනු පිරිසයි
අනේ වෙනසක් නෑ සැම අගෙයි

සෙත්කවි සමග වස්කවි
ලියන්නට සිත ඇති බැවිනි
නව අඩවියක් විලසිනි
මධුමාධවී බිහිවුණි

පළමු පියවර තැබුවෙමි
දුරක් යන්නට සිතනෙමි
සැම සැප පතන්නෙමි
ස්වස්ථි සිද්ධම් කියා කියනෙමි