ටොයි බජට්

(උපුටාගැනීම හැන්සාඩ් වාර්තාවෙනි)

ගරු එම්.එම්. මාදාවියා (සුවාදීන) මහතා-

ගරු කතානායක තුමනි,

මේ අයවැය පිළිබඳව, විරුද්ධ පක්සේ වාඩිවෙලා ඉන්න නිසා, වැරදි විතරක් පෙන්නා දෙංට තමා මං අදහස් කොරන්නෙ. මොකද අපේ රටේ විරුද්ධ පක්ස හැදී පැහැදී ඉන්නෙ ඒක කොරංටනෙ.

අනික මේ අයවැය ඉංගිරිස් වලිං කියෝපු එක ජාත්‍යන්තර කුරුමන්තනයක්. මම පැහැදිලිවම ප්‍රකාශකරනවා, මෙතන ඉන්න මං ඇතුළු තුනෙං දෙකකටම ඔය කියෝපුවා තේරුනේ නෑ. මාත් ඒ වෙලාවෙ හීනෙං අස්ප ගෝං ටික් ටික් කිය කියා තමා හිට්ටෙ. පහුවදා ඔය එක එක පත්තර අනං මනං වල දාපු ට්‍රාන්ස්ලේසොං එකට පිං සිද්ද වෙංට අද මෙහෙම කතා කොරනවා. නැත්තං අදත් අස්සය ගෝං ටික් ටික්.

ගරු කතානායකතුමනි,
මුලිංම බලන්න අපේ මේ මුදල් ඇමතිතුමා ගෑස් බස්සලා තියෙනවා (සබාවේ ගෝසා). නෑ නෑ එතුමාගේ බිරිඳගෙ නෙමේ අනෙකුත් ගෘහස්ත සිලින්ඩර වල. අපේ ගෙදරත් පොඩි එකකුයි ලොකු එකකුයි තියෙනවා. ඔය සොච්චං මංත්‍රී වැටුප වැටුනම පොඩි එක ගෙනියනවා අඩේට තියංට. වෙන ඔය පොඩි කෝටා එකක් ජරාවක් කාරිය වැඩකලාම ලොකු එක ගෙනියනවා. දැං බලංට, පොඩි එක අඩුවෙලා නෑනෙ. ලොකු එක අඩුවෙලා. දැංනං සිලිංඩරේ 1300 කට විතර හම්බුවෙයි..මාත් හරියට ගාන දන්නෑ. නෝනා තමා ඒවා දන්නෙ. මම ඉතිං දන්නෙ මට ඔය ඉඳල හිටල යන බයෝ ගෑස් වල ගාන විතරයිනෙ.

එතුමා බූමිතෙලුත් බස්සලා. අන්න එව්වානං බස්සන එකමයි කාරිය. දැං මේ ආණ්ඩුවත් යන විදිහ බැලුවම, මේ රටේ මිනිස්සුත් ස්වයං ආදාහනේ කොරගංට ලාබ දායී කරමයක් හොයනවා ඇතිනෙ.

දැන් බලංට මේ කඩල උපරිම මිල 169 කරලා කියලා තියෙනවා. මේවා බොරු වැඩ. කඩල කන්නෙ කවුද? අස්පයො...අස්පයො. මේ උතුම් දේසේ අස්සයෝ පැද්ද හැමෝටම කෙලවිලා තියෙන්නෙ අතීතෙ ඉඳං. ඩී.ඇස්. මහත්තයා මලේ අස්පය පිටිං වැටිලා. ඊට පස්සෙ මෑතකදි වුණත් මේ .... මේ බූමිතෙල් ලාබයි නේද? හැක් හැක් ඕවා මතක තියෙනකං මේ රටේ එකෙක් පදින්නෑ අස්පයො.

ළදරු කිරිපිටි...ම්... ඒකනං හොඳා. මොනා උනත් දැංකාලෙ පොඩි උං හරි ආසයිනොවැ හරක් කිරි වලට. මොලේ වැඩෙංටත් එක්ක ඒක හොඳ යෝජනවක් මුදල් ඇමතිතුමා (සබාවේ අප්පොලසං) දැං කිරි පැකට් එකක් 295 කට විතර ගංට ඇහැක් එක හොඳා. ඕකත් නැත්තං අපේ ළමයි..මං මේ කිව්වෙ ජනතාවගෙ ලමයි ඉතියෝපියාවෙ උං වගේ වෙනවා...ඕ යේස්

ආච්චිට හාල් ගරන්න ගරු කථානායක තුමනි,

අද වෙළඳපොලේ තියෙන මේ අැට ජාතිවල ගණං ඇහුවම මාලඟ තියෙන දෙකත් දැවිල්ල අල්ලනවා. මුං ඇට 250-260. කවුපි 240-250. මයිසූර් ඕන්නං 300 ටත් ගත්තැකි. ඒ හිංදා පරිප්පු 169 කරපු එකත් හොඳා..එතකොට ඉතුරු රුපියලට මක්කැයි වෙන්නෙ? මොනාද ඇමතිතුමා මේ බාටා ප්‍රයිස්? මේ...මයිසූර්ද? වටානාද? ඒක පැහැදිලි නෑ. (තේරෙන සිංහලෙං කියෝපංකො බජට් එකවත්)

අම්මට හුඩු ගරු කතානායකතුමනි,

හාල්මැස්සො සීය හතලිස් එකයි! පට්ට ලාබයිනෙ ඕයි! ඔතන මේ රුපියල තමා ප්‍රශ්නෙ. මේක ආණ්ඩු පක්ෂෙ විශාල සැලැස්මක් ඇතිව ගහපු ගැටයක්. දැන් බලංට. හාල් මැස්සො පොඩි උන්ට හොඳානෙ. පට්ට පෝෂණයක්නෙ තියෙන්නෙ. හාල් මැස්සට පෝෂණේ නැති නිසා ඌ හාල්මැස්ස වගේ ඉන්න එක වෙනම කාරණාවක්. කලිං තිබ්බ ගානට හාල් මැස්සො සීයකට වඩා ගෙදර ගෙනියංට බෑනොවැ.

කරෝල මිල බස්සපු එකනං බෝම හොඳා... මෙන්න ජාතියට ප්‍රෝටීන් දෙන අය වැයක්. මං නැගිට්ටෙනං පතුරු අරින්න බලාගෙන. ඒ වුණාට...ම්...බලමු තව පොඩ්ඩක්. කට්ට කරවල...ම්... කරවල කට්ටද?

රටළූණු, අර්තාපල් රුපියල් 25 කින් පාතට. ඕවා ඉස්සුවා නේද තමුන්නාන්සෙලාම පහුගිය දවස්වල. හරි හරි. දැං තමා ප්‍රශස්ථ මිල..හුහ්. තමුන්නාන්සෙලා ළඟට ගෙන්න ගන්න ගෑනුන්ගෙ රෙද්ද උස්සන ගානට බඩු මිලත් හිතූ හිතූ හැටියට උස්සන්න තියාගත්තොත්, සෙත්ත පොච්චි වෙලා තව අවුරුදු විස්සක් විතර මේ පැත්තෙ ලගිංට වෙයි..හිටං. එක්කෙනෙක් දෙන්නෙක් නෙමේ කෙලෝගත්තෙ මිනිස්සුංගෙ බඩට ගහලා.  

Zero-Based Budgeting? මේ කියන්නෙ අවුරුද්දෙ මුල හැම ගිනුමකම ගාණ බිංදුවයි කියලා පටං ගන්න එකද? ආ...මේ තියෙන්නෙ. සේරම වියදං සාදාරණිකරණය කොරලා පෙන්නංට ඕනෑ කියලා. ඒකනං කොරලා පෙන්නයි අපේ උන්දැලා. අනික ඉතිං අපේ එකවුන්ටන්ලා ගෝල් සීක් දාලා එකවුන්ට් හදන කස්ටියනොවැ හැක් හැක්!

මළ කෙළියයි ගරු කථානායකතුමනි,

මේං මෙතුමා කියනවා ආර්ථික වර්ධන වේගය 6% ක සාමාන්‍ය අගයක පවත්වාගෙන ගියාලු. උද්ධමනය 2% කින් අඩු කලාලු. හැබැයි...පහුගිය කාලෙ අපි ගිය වර්ධන වේගෙ හැටියට ඇමෙරිකාවත් හෙල්ලිලා ගියාලු. ඔව්...ඔව්... කමක් නෑ. ඔබතුමා ඕක පවත්වගෙන යංටකො. තාම බැංකුවල පොලියනං එහෙම්මයි. සීයට දෙක...! හුහ්

ජාතික ආරක්සාවට අළුත් අළුත් කෙරම ගේනවා කියලාත් තියෙනවා. ඒ මොනාද අප්පා ඒ? හරි..හරි... ඇස්වල කළු ඉංගිරියාවෙං අයිඩිංටිය හදංට..වගේ එව්වා වෙංටැති. ඕවා ගොඩක් රටවල දැනටත් තියෙනවා. මේ...මට පේන හැටියට...මේ පාරනං රට ලෝකෙට ටිකක් ඇරෙංට වගේ යන්නෙ. මේවා කොලේ තිබ්බා වගේ නෙමේ පුතෝ... ජාතිකාරස්සාවට කියලා හෙට ඉඳං ෆේස්බුක් වහංටයි බුරි වහංටයි තියාගන්නව නෙමේ ඕං...මගුල!

අර ගෝනි බිල්ලො කේස් එක ගැනත් බලංට වෙයි. තමුන්නැහැලගෙ බුදු ෆිට් එකනෙ ඉතිං.

පුද්ගලික අංසෙට නිර්මාණසීලී වැටුප් ක්‍රමයක්. පඩියෙ ලබ්බද මහත්තයො නිර්මාණශීලී වෙන්නෙ? අතට ගන්න එකාට බරට දැනෙනවානං එච්චරයි. මයෙ හිතේ ලස්සන පාට පාට පඩි පැකට් එකක් හදල, දිලිසෙන පෑනකින් නම ලියලා...ඈ....අනේ හුකේ.

උපාධිකාරයිංට සලකංට වගේ යන්නෙ. ඒවා හොඳයි. අපි වරදක් කියන්නෑ. හැබැයි ඔළුවට ලෑල්ලක් ගහගෙන, කලු කෝට් දාගෙන, පදක්කං එල්ලගෙන උජරුවෙං උපාදි ගත්තු ඒ කොල්ලො කෙල්ලො ටික ගම වටේ යවනව නෙමේ පැල බෙදංටයි ඇට බෙදංටයි.

මේ...ඉස්කෝලෙ ලමයින්ට කොරංට යන වැඩේ...ඒ කියන්නෙ හර විෂය මාලාව ඇගයීමට අමතරව දක්ෂතා ඇගයීමේ ක්‍රමයටනං මං අත් දෙකම උස්සනවා (සබාවේ අප්පොලසං). මේවා තමා කොරංට ඕනෑ. කොරංටත් ඕනෑ හොඳේ. මේ රටේ අනාගතේ බාරගංට ඉන්න එවුංට තියපු තියපු හැම විබාගෙදිම අමු පිස්සු කෙලපු ප්‍රස්න පත්තර හදපු ආණ්ඩුනෙ මේ රටේ තිබ්බෙ. වෙන රටකනං අද්යාපන ඇමතිලා අස්වෙන්නෙ එක රැයින්! එහෙම පුළුවනෑ මෙහේ.

සුළු හා මධ්‍යම පරිමාණ වෑවසායකයිංට ඇප නැති ණය (ආධාර? ණය වල මක්කැයි තව ආධාර? ණය කියන්නෙ ණය. ඒකවත් දන්නෑ.) සඳහා රුපියල් මිලියන පන්සීයක්? කෝටි 50 ක්. හපොයි! එක තේ පැට්ටරියක් ගත්තම ණය විතරක් තියෙනවා රුපියල් කෝටි තිහක විතර. කමක් නෑ. එක පැට්ටරියක් ගොඩ. තව එකක් තුනෙං දෙකක් ගොඩ. ඔහොම යං. ඔහොම යං. මෙහෙමත් එකක් තියෙනවා. ඕක ලක්ස 5 ගානෙ පොඩි උං දාහකට දුන්නනං අන්න වටිනවා. මං හූණා කියන්නැහේ කියන්නං. ඔය කෝටි පණහට අරින්නෙත් ලොකු ලොකු එවුං දහ දෙනෙක් විතර. ඔය කෝටි පණහ දෙංට ඇමතිතුමා ළමයෙකුට!

ජාතික කෘෂිකාර්මික ප්‍රතිපත්තියක් ඇති කරන බවත්, බිජ්...ආ..බීජ විවිධාංගීකරණයට , රෝපණ ද්‍රව්‍ය ඇති කිරීමට පුද්ගලික අංශයේ සමාගම් දිරි ගැන්වීමට කටයුතු කරන බවත්, ඒ සඳහා රු.මිලියන 1000 ක මුදලක් වෙන්කරන බවත්... හැක්..හැක්... මේක අපේ ජනාධිපතිතුමාගෙ බට් එකක් මයෙ හිතේ. අර බිජ්..ද මොකක්ද එක විවිධාංගීකරණය කිව්වෙ ජාන සෙල්ලං වෙංට ඇති. කමක් නෑ. අපිටත් ඇහැක්වෙයිනෙ ඇට නැති කොමඩු එහෙම කංට. මේකටත් මං එකඟයි.

හම්මට සිරි.........කතානායකතුමනි! හාල් බස්සලා...! බැස්සුවා වගේ නෙමේ. මාස දෙකෙං තුනෙං අායි නග්ගනවා නෙමේ දෙයියංගෙ හාල් කැවෙංට. යකෝ මේ සමහරක් රටවල ආණ්ඩු කරන උන්ගෙ මොකද්ද එක නගින්නැති හිලව්වට මිනිස්සු තුංවේල කන හාල් ටික නග්ගනවනෙ. එතන හිටං බෙරිහං දෙනවා ඇමෙරිකං පිටි වර්ජනය කොරව්! අපේ ගානට හාල්ම කාපියව් කියලා. මෙහෙමත් එකක් තියෙනවා. තේ වලට බී ලීෆ් සික්ස්ටි ද මක්කද සහතික මිලක් දීලා කෙලෙව්වනෙ පැට්ටරි ටිකට. ආයි වී ටිකටත් ඒක කොරනවා නෙමේ සහතික මිල දෙංට ගිහිං. තමුන්නාංසෙලා ටෙස්ටිං කොරගංට ගෙදර ගිහිල්ලා. මිනිස්සුංගෙ ජීවිත එක්ක ඒ සෙල්ලං එපා.

ගරු කථානායක තුමනී............

පෝර සහනාධාරෙ පෝර වලිං නැතිව හෙක්ටයාරෙකට විතරක් රු.25000 ක් සල්ලි වලිං දෙංට යනවා කීවනෙ. අක්කර පණහ තියෙන එකා ඕක අරං ඉතුරු හතලිස් හතහමාර මැරෙංට ඇරලා දායිද දන්නෑ...හැක් හැක්. මේ අපේ ගමේ ගොයියො ඔය විසිපංදාහ ගත්තු දාට ගෙදර යනවා මට මැවිලා පේනවා. කයියෙම්ම කියංටද?

තුනේ රෝදේය, නැගලා යනවාය

ලිඳේ පනිදාය, ලිඳ තුල කසිප්පුය

අතකින් කුකුලෙකිය, අතෙකින් බාගේය

සහනාදාරෙ පැය දෙකකින්, හිඳුනේය....හෙහ් හෙහ්

රුපියල් කෝටි තුංදාස් හස්සිය පනහක්ම වෙං කොරලා තියෙන්නෙ සහනාදාරෙ. අවුරුද්දට තුං පාරක් දුන්නොත් ලක්ස පහක් මිනිස්සු යැපෙනවා. බලමු. ඕවා වෙයිද කියලා. තමුන්නාංසෙලගෙ ප්‍රතිපත්ති හෙන ඩයිනමික්නෙ. කියංට බෑ එකපාරක් දීලා අල්ලලා දායිද කියලා.

ධීවරයිංට ලක්ස දහයෙ ජීවිත රක්සනේනං හොඳා. කොම්පැනියට කියංට අදිංනැතිව ගෙවංට කියලා වෙලාවටම. ගෙදර අනික් උනුත් මූදට පැන්නට පස්සෙනං වැඩක් නෑ ඕං. මේ ධීවර වරායවල් පහක් සංවර්ධනය කිරිල්ල හොඳයි. චීනට මාලු අල්ලංට දෙංට එපා. කෙලෝගත්තනෙ එක පාරක්.

තේ රබර් පොල් පරියේසන ආයතන වලට රුපියල් කෝටි විස්සක් අවුරුදු දෙකකට! මේ කස්ටිය වෑවසායකයො දැනුවත් කරංට කියලා කට්ලට් එකයි, පාං පෙති තුනයි බෙදලා ඉවර නොකලොත් මේ සල්ලි ටික....... අර තේ රබර් කර්මාන්ත සාලා බදු නිදහස් කිරීමත් හොඳා... හැබැයි පැට්ටරි අලුතිං දානකොට ලෝන් එකෙං සීයට දහයක් දෙංට කිය කියා පස්සෙං යවනවා නෙමේ බහිරවයෝ එහෙම.

පොකුරු ගම්මාන 14 ක් හදංට යනවාලු. එක ගමකට කෝටි 150 ගානෙ වෙං කොරනවලු. ආයි පිල්ලි යයිද? ටකරං හැංගෙයිද? පිං වතුර ගලයිද? ඈ... ඔය දාහතරට වෙං කරපුවයිං බැරිද ගම් දෙතුං සීයකට යංට පාර හදංට. පාරවල් හැදුවෙ නැත්තං රට දියුණු වෙන්නෑ මහත්තයෝ. අහංට අපේ හිටපු...නෑ ඕන්නෑ.

රත්තරං ඉම්පෝට් කොරංට 50 දෙනෙකුට චෑංස් එක තියෙනවා ඕං. මීට පස්සෙ බලපත්‍ර දීපු ඒ පණස් දෙනාට විතරයි රත්තරං ඉම්පෝට් කොරංට වෙන්නෙ. හුටා! අදෝ මාර්ගයෙං ඉම්පෝට් කොරන එකටත් කෙළවුනා නේද?

ඌණ-උපයෝජිත ඉඩම්, හෑ...ආ නැත්තං, ඒ කියන්නෙ ඉඩමකිං හරි හමං පොරෝජනයක් නොගෙන වල් වැදෙනවනං, පවරගන්නවා කියලද? ආණ්ඩුවෙ වල් වැදිච්ච ඉඩං ටික දෙනවද? කමක් නෑ ගෙවල් හදංටනෙ. යසට තියෙන කැලෑ පොජ්ජට කෙලිනවා හෙම නෙමේ අර කවුද වගේ ඈ... ගෙවල් නං හදන එක පිනක්. ඇමතිතුමෝ. පේමදාස මහත්තයාට මිනිස්සු මොනවා කිව්වත්, උන්නැහැ හදපු ගෙවල් ටිකයි, ගාමන්ට් ටිකයි ඇති උන්නැහැට දිවිය ලෝකෙ යංට. මෙතනත් ඉන්නවා එහෙම කෙනෙක්. එයාත් කොරපු ටික ඇති දිවිය ලෝකෙ යංට. පස්සෙ පස්සෙ තමා මේ... හරි අපි බජට් එක ගැන කියමු.

ගරු කතානායක තුමනි,

අවුරුදු 10 ට වඩා බුත්තිය තියෙන ඇත්තංට ස්වර්ණබුමි ඉඩං පැවරිල්ල හොඳා. අර වැලි ගංට මූද හෑරිල්ල ගැනනං මං මොකුත් කියන්නෑ. මොකද? මේ පරිසරයට අපි අරින ඇරිල්ල ඇති හොඳටම. ගෙවල් හදංට වැලිම ඕනි කියලා නෑ ඇමතිතුමා. තව ක්‍රම තියෙනවා සිමෙංතියෙං බඳින බිත්තිම නැතිවට.

ඉස්කෝල ළමයිංට බැංකු ගිණුම් ඇරලා දෙන එක හොඳා. ඉතුරු කරන්නැති ඈයොංට ඉස්ට්‍රෙස්ද මොකද්ද හැදෙනවා තමා. හැබැයි බැංකුවලට කියංට කම්මැලි නැතිව ඉස්කෝලවලට ගිහිං සල්ලි එකතුකරගෙන එංට කියලා. සෝබනේට කවුන්ටරයක් විතරක් අටෝලා පැත්ත පලාතෙ යන්නැතිව ඉන්නැතිව.

පාට් ටයිම් ජොබ් සංස්කෘතියත් බෝම හොඳා. අපිටත් ඔය පාර්ලිමේංතුව නැතිදාට වළඳක් පිඟානක් හෝදගෙන ඉංට බැරිය (සබාවේ ගෝසා). නෑ...නෑ... එහේ ගිහිං හෝදංට කට්ටිය දැනටමත් ඉන්නවනෙ.

ඔය සතියේ වැඩ දවස්ගාන දින 5 කොරපු එකත් හොඳා. ඕටී එක බාගෙට ගෙවංට තමා ප්‍රයිවට් කොම්පැනි කාරයො සෙනසුරාදා වරුවක් වැඩ දාගන්නෙ. යස වැඩේ. දැං ගෙවපියව් එහෙංපිටිං. නැහ්නං නිකම්ම හිටපියව්. කොහොමත් 2500 ක් පඩි වැඩි කරංටත් වෙලානෙ උංදැලට. කාගෙ උනත් කමක්නෑ පඩි නං වැඩි වෙංටම ඕනි. අනික ප්‍රයිවට් කොම්පැනි කාරයෝනං හැඳි ගෑවිලාම යංට ඕනෑ. ඕකුංගෙ කොම්පැනි බංකොලොත් කියලා බැරිද හැබෑටම ආණ්ඩුවට පවරගංට? කීයක් ගියත් මක්කැයි. ඊ්ට පස්සෙ අපේ එවුංට ඩිරෙක්ටෝස් රිමියුනිරේසොං ලැබෙනවානෙ. ඇයි, ඩිවිඩන්ඩ්ස්?

ඉස්කෝල හයදාහක් විතර තෝරගෙන ඒ එකකට ලක්ස පනහ ගානෙ බෙදංටත් ලෑස්තිලු නේද? පිනාලයි, අද්දියස්සලයි, ඇමැති, මහ ඇමති ආදී ඉස්කෝල බබාලටත් හබුං කටක් වැටෙයි නේද කටට? ඕවා ඇලෝකේට් කොලා වගේ නෙමේ ඇමතිතුමා අර සීරෝ බේස් බජට් තාලෙටම ගිය වියදං පෙන්නංට කියංට හරියට ඈ...

මේං බලංට ගරු කතානායකතුමනී,
ඉස්කෝල, විස්ස විජ්ජාල වලට කෝටි 9000 ක්ම? ඒකත් හරි. හැබැයි අද්යාපනේට 6% ත් මදි මංනං කියන්නෙ. මේවා මහත්තයෝ පැල තවාන්.

මාලඹේ අරිංට යන මහපොල විස්ස විජ්ජාලෙටයි, ප්‍රයිවට් විස්ස විජ්ජාල ඇරිල්ලටයි මේ මාත් අත ඉස්සුවා. (සබාවේ අප්පොලසං). ඔය කැම්පස් පැටව් රෙදි උස්සගෙන කැට උස්සගෙන එනවා නේද පෞද්ගලික විස්ස විජ්ජාල එපෝ කියාගෙන. දැං බලංට කතානායකතුමා, ඔය ළමයිම මොංටිසෝරි කාලෙ ඉඳං ඉගෙනගන්නෙ කොහෙංද? ටියුෂන් පංතිවලිං. අන්න ප්‍රයිවට් විස්ස විජ්ජාලවල මුල. ඒවයෙ උගන්නන්නෙත් ඉස්කෝලවල ගුරුවරු වැඩි හරිය. ඔය ප්‍රයිවට් විස්ස විජ්ජාලවලටත් එන්නේ ආණ්ඩුවෙ විස්ස විජ්ජාලවල ප්‍රොපාලමනෙ. යකෝ ගුරාලට ටියුෂන් කලෑකි. ඩොකාලට ප්‍රයිවට් ප්‍රැක්ටිස් කලෑකි. තව එක ළමයෙක් හරි මොනා හරි ඉගෙනගන්නවට රෙද්ද උස්සගෙන කෑ ගහනවා. කුහකකම අප්පා. බේත් නෑ.

කැම්පස් කොල්ලංට පොලිය නැති බැංකු ණය දීලා ලැප්ටොප් අරං දුන්නා වගේ නෙමේ ඒවා අස්සේ අනං මනං තියෙනවා කියලා උන්ව පොලීසිවලට ගාල් කොරනවා එහෙම නෙමේ. අනික අර සොරොව්ව ඇරලා කක්කුටු බෙනේට ඇඟිල්ල ගහං ඉන්නවා වගේ පෝං සයිට් බ්ලොක් කරංට කාලෙ නාස්ති කොරනවා නෙමේ. ඒ කාලය වෙන මක්කට හරි ඇඟිලි ගහං ඉන්නවනං, ඇඟිල්ලටත් හොඳා...කක්කුටු බෙනේටත් හොඳා...

වකුගඩු රෝගීන්ට ඉස්පිරිතාලයක් හැදිල්ල (මින්නේරියේ....?) හොඳා. අර ලේ කාංදු කොරන තැන් 1000 ක් හැදිල්ලත් නරක නෑ. මිනිස්සුංට හොඳට විස්වාසෙං බොංට වතුර දෙනවානං, ඊටත් වඩා පිං. මේකත් මේ අපේ ජනාධිපතිතුමාගෙ සීන් කෝන් එකක්ද කොහෙද.

පිළිකා රෝහල් තුනයි, අනුරාධපුර, යාපනේ, කුරුණෑගල මහ ඉස්පිරිතාල ඉස්සිල්ලයි ගැන මං මොකුත් කියන්නෑ. රටේ තව ලොකු කලාපයක් මග ඇරිලා බවනං පේනවා. ඒ ඒ කලාපවල මංත්‍රීලා නැතෑ. මං මොකටැයි කරදර වෙන්නෙ.

පොලීසි ගාන වැඩිකිරීමයි පොලීසියට ගෙවන ගාන වැඩිකිරීමයි කලාට කමක් නෑ. ඒ වැඩි කිරීමත් කාලා ඇවිත් මේ පාරෙ යන මිනිස්සුංවයි, කැම්පස් කොල්ලංවයි කන්නැතිව.

ඉම්පෝටඩ් පොත්, සඟරා වල බදු අයිං කිරීම බෝම හොඳ තීරණයක්. අපේ මිනිස්සු පොත් පත් කියවනවා හොඳටම මදි. ලෝකය ගැන දන්න හරිය ඊටත් මදි. දැංවත් මේ රට ලෝකෙට ඕපොං කොරනවනං ගාත් හතරෙංම සැලියුට් ඕං.

මත්තල ගැන මං මොකුත් කියන්නෑ. ඕනි මගුලක් කොරගන්න එකයි ඇත්තෙ. දැං ඉතිං බැඳගත්තු බෙරේ ගහංටත් එපෑ. අර හයිවේ එකට කළමණාකරනයද මොකක්ද කොරංට ඒකකයක් පිහිටවිල්ල හරියට කොරනවනං හොඳා. තනතුරු, ආයතන ඇතිකලාට කමක් නෑ. සුදු අලි වුණාම තමා ඇණේ.

මං අහන්නෙ ගරු කතානායක තුමනි,

අර අළුත් විශ්‍රාම වැටුප් කෙරමෙත් දායකත්ව මගුලක්ද? ඒක පැහැදිලි නෑ. දායකත්ව වුණත් කමක් නෑ. අන්තිමට පිල්ලි අරිනවා නෙමේ ඈ. ඔය මොන මගුල හරි නියාමනය කොරනවා, ඒකාබද්ද කොරනවා කියකියා සල්ලි ටිකට අරිංටනං හදන්නෙ මේ රටේ වැඩකරන මිනිස්සු සේරම පාරට බහීවි. ඒවා තමුන්නාන්සෙලාම බලාගන්නවලා. බැරියැ ඊට පස්සෙ එකෙක් දෙන්නෙක් විශ්‍රාම පිණිසෙ එලොවම යවංට.

මේ රට රස්සා සැට් එකට රු.42,000 ක අවම වැටුප නියම කලාට, අපේ රාජ්ජ තාන්තිරික සම්බන්දතා දැන් කෝමද දන්නෑනෙ මම. ඒවා හොඳට තියේනං මේවාත් පුළුවං වෙයි. අර අතනිං මෙතනිං ගහලා එවන ඇණ වලට කීයක් අඩුකරයිද දන්නෑ නේද හාම්පුතාලා, බාබලා, ගෑනිලා එහෙම?

දැං ආණ්ඩුවෙ වියදම විතරක් ලබන අවුරුද්දට ට්‍රිලියන දෙකක් කිට්ටුව නේද? කෝටි 20000 ක් හප්පච්චියේ.

දැං කෝ එතකොට ආදායම් ඇස්තමේන්තු? ආ...ඒවා ගැන අනික් මංත්‍රී තුමංලා අම්බානකට දෙසන හින්දා මං ඒ ගැන කතා කොරන්නෑ. මක්කා උනත් මේ අයවැය කිරියාත්මක කිරිල්ල බාගෙට තමා සිද්ද වෙන්නෙ මං හූණා වගේ කියන්නං. 

එහෙම නැතිව තුංකාලක් හරි හරියට කලොත්, මේක ගැන මට කියන්න තියෙන්නෙ එක වාක්‍යයයි. ඒකත් ප්‍රශ්නාර්ථයක් මෙන්න මේ වගේ. 

කොහොමද ටොයියංගෙ බජට් එක?

෴෴෴෴෴෴෴෴෴෴෴෴෴෴෴෴෴෴෴෴෴෴෴෴෴෴

ප/ලි.
(අධික ලෙස නිදිවැරීම හේතුවෙන්, අධි රුධිර පීඩන තත්ත්වයක් යටතේ රෝහල්ගතව සිටීම නිසා මේ අහ හක්කලං කොරංට නොහැකි වීම ගැන සමාව බාජනයකට දමා ගඟේ පාකරන මෙන් ඉල්ලමි. ලෙඩ බලංට ආ අයටත්, ඉක්මන් සුව පැතූ සැමටත් ණයගැති භාවය පළකරමි. විශේෂයෙන් මධුමාධවී වෙනුවෙන්ම පෝස්ට් එකක් දැමූ කුරුට්ටන්ට අනේක වාරයක් ස්තූතියි! මාරි කන්න බලාගෙන හිටපු උන්දැලාගේ බලාපොරොත්තු කඩවීම පිළිබඳ අපගේ සාතිශය සංවේගය! ඊ ළඟ පාර බලමු...දැං ඉතිං පැච් එකක් ගිය ටයර් එක වගේනෙ. හෙහ් හෙහ්.)

Up Next: Pakistan Magic Shoes

Up Next to Next: 100 Hours at a Hospital