පුරුෂාධිපත්‍යය

දවසක්දා හැන්දෑවක-සුවාමි පුරුෂයෙක් ඔන්න

"නිවසේ රජු සැමියා" නම් පොතක් කියෙව්වා

පොත කියවා ආපු ගැම්ම- පිටිං දුවපි මුලුතැන්ගෙට

"මේං මේක අහනව" යැයි බිරිඳට කීවේ

"මෙතැන් පටන් මේ නිවසේ -රජා වන්නෙ මේ මම නොවැ

මගේ වචන තමයි ගෙදර නීතිය වන්නේ

එහෙනම් අද රෑ වේලට-සුපිරිම කෑමක් ඕනෑ

අතුරුපස ද අඩු නැතිවම තිබෙන්න ඕනෑ

කෑමෙන් පසු මං යනවා-කාමරේට නිදාගන්න

ඔහේ ඇවිත් මට උපරිම සැපක් දිය යුතූ

එයින් පස්සෙ නාගන්නට-උණුවතුරත් තැබිය යුතුයි

හොඳ සම්බාහනයක් මා හට දෙන්නට ඕනෑ

දැන් කියනව බලන්න මට-නින්ද ගියායින් පස්සේ

මගෙ හිසකෙස් පීරන්නේ කවුරුද කියලා"

මේ කතාව කොනක හිටං -අහං හිටපු ගෙදර උන්දැ

අත් දෙක ඉණ දෙපස තබා රවා බලාලා

"ඔය පාරෙන් ආවොත්නං - තමුසෙගෙ හිස පීරන්නේ

අවමංගල අධ්‍යක්ෂක" යැයි පැවසූවා