දොඩම්

මිත්තනියයි මිනිබිරියයි තමා උන්නෙ එක ගෙදරක
මිත්තනියට හොරෙන් යෙදේ මිනිබිරියද රැකියාවක
ලෝකෙ පළමු රැකියාවලු කරන්නෙ යාබද නගරෙක
කිසිවෙකුටත් නොදැනී එය සිටියා රහසක් ලෙස රැක


දවසක්දා ඈ සිටිනා මඩම හොරෙන් වට කරලා
සිටි ගණිකාවන් සැමදෙන පැනයනු නොම දී අල්ලා
පොලීසියට ගෙන එන්නට පාර දිගේ පෙල හදලා
ඕ අයි සී මහත්තයා රාජකාරි ඉටු කරලා

මිනිබිරියද මේ පෝලිමෙ පොලීසියට ගෙනයන්නේ
ඒ අතරේ හදිසියකට ආච්චි නගරෙට එන්නේ
මිනිබිරි දැක මේ මොකදෑ මේ පෝලිම විමසන්නේ
කලබලේට බොරු ගොතලා ඇය මේ පිළිතුර දෙන්නේ

ආච්චියේ පොලීසියේ දොඩම් බෙදනවා අද දින
ඒව ගන්න මේ පෝලිමෙ යන්නේ දැන් අපි සැම දෙන
අනේ දුවේ මටත් ඕනි එහෙනම් ඒ දොඩම් ගන්න
කියා එක්වුනා ආච්චි ඒ පෝලිමෙ කෙළවරකින

පෝලිම ටික ටික පොලිසිය ඇතුලට යනවා
සාජන් තැන කට උත්තර ලියා ගන්නවා
මෙන්න බොලේ ආච්චියෙක් අගටම එනවා
සාජන් තැන පුදුම වෙලා මෙහෙම අහනවා

පේන ලෙසට හැත්තෑවත් පැනල වගේනේ
මේ වයසට ඔබ කොහොමද ඕව කරන්නේ
මහත්තයෝ මම දත් සැට් එක ගලවන්නේ
ඊට පස්සෙ අන්තිම බින්දුවට උරන්නේ